الأقباط والحقوق المهدرة

     الاغتصاب مش بس فعل جنسي وعضو في عضو وشوية سوائل وزحلقة، الاغتصاب هو اي انتهاك لكرامتك وحقوقك اللي اتنازلت عنهم بكامل ارادتك، او تم تغييبك وتجهيلك لحد ما نسيت انك انسان من حقه الطبيعي أن يتم معاملته بآدمية. رجال الدين المسيحي بيغتصبوا خراف الكنيسة ليل نهار بقوانينهم وحكمهم الملي وتعسفهم وتراخيهم في حل مشاكل الناس، رغم أن دا مش دورهم اصلاً، ولكن اوهموا الاقباط ان مكانهم الكنيسة وليس الدولة، القداس وليس البرلمان، حظيرة الخراف وليس المجتمع المدني، فاستمر التغييب والانعزال الاختياري، بالتالي وصلنا لمرحلة من الانبطاح والمازوخية ان لو شخص مسيحي جه الكاهن وتف في وشه وخد مراته منه، هتلاقيه متهلل ويقولك "دا ربنا بيختبرني... صليبي ولازم اتحمله.. حتى يعلن الله مجده فيا"، وحتى لو تم اثبات جريمة وانتهاك لاحد الكهنة، الناس اغلبهم وضعوه في مرتبة فوق النقد والمساءلة، فيردوا عليك ببرود "كلنا بشر وبنغلط... واحنا مين اصلاً عشان ندينه"، ويتم تغطية الجريمة والسكوت عليها احسن شكلنا يبقى مش تمام قدام المسلمين، ويشمتوا فينا ان عندنا فضايح في الكنيسة. السكوت على المغتصب مساعدة له وتأييد في اللاوعي لافعاله.